Amazing adventure that I did in March, 2012 - Jumping from a plane with no previous experience at all is a breath taking thing that you willl never forget in your life :) in this post I will take you through the experience which I highly recommend.

Here, I will share the details of this outstanding JUMP :) 

الاتجاه العجيب

علي مدي الايام اللي فاتت  ، كان في اتجاهات مختلفة متباينة تباين عجيب .. منها اللي عظيمة ومنها اللي غريبة ومنها اللي مريبة ولو دققت كويس أكيد هتلاقي كل انوع الاتجاهات ..

اتجاه الثوار اللي في التحرير او اللي واقفين في أي حته فيكي يا مصر .. اللي جابوا لينا الفخر ده والعزة دي .. ولسه لدلوقتي وافقين .. مناضلين مركزين .. وبيوقفتهم دي .. كل يوم بياخدولنا نصر جديد ومكسب جديد عمر ما كنا نتخيله ولا حتي في احلامنا اليقظة ..

واتجاه المعترضين .. اللي حقهم برده يفضلوا معترضين .. أكيد مكنش هيبقي معترض أو محايد أو زهقان أو تعبان إلا لو كان عنده سبب قوي ووجيه .. واكيد لو كنت مكانه بظروفه وبحياته ومسئوليته .. مكنش بعيد ان مكنش أكيد يبقي رأيه رأيك وموقفه موقفك .. بس كمان هما فاهمين ومقدرين وموجوعين وعارفين كويس اوي قيمة ال 300 شهيد اللي راحوا مننا وقلبوهم موجوعة أكتر من الخوف علي الموجودين في ميدان التحرير دلوقتي وبعدين .. وياخوفنا من بعدين وانتقام بعدين .. ويارب ما يجي بعدين بالشكل ده ولا الريحة الوحشة دي علشان كل ده دلوقتي علشان بعدين يبقي مفيش اجمل منه ..  

واتجاه المغتربين .. اللي يمكن منهم اللي كان بيشتم ويسب فيها .. ومنهم اللي سبها علشان اللي كان بيعانيه او شيفه فيها .. ومنهم اللي سبها علشان حياه أفضل ومستقبل أحسن بعيد عنيها .. بس أكيد كلهم بيموتوا فيها .. مصريين .. وبلدهم .. حبيبتهم .. قامت قيامتها ومش هتسكت غير لما تبقي وردة مفتحة كلها خير وحرية .. واقد ايه أحساس  "مصري وأفتخر" عظيم .. مهيب .. وعلشان كده بقوا موجودين وكأنهم معانا .. مقطعين الفيسبوك شير ودعم وتأييد وشتيمة وكل اللي قلبك يحبه وأكيد لو يقدر كان هيبقي هناك في التحرير .. بيقول ويعيد في ولاد الترباتاتيييييت ..

واتجاه تاني عجيب... ممكن تلاقي فيه معترضين وفاهمين ومغتربين ومحايدين ومتترددين وزهقانين وخايفيين .. الحاجة الوحيدة المشتركة بينهم هو هوس الفيسبوك وسنينه .. 24 ساعة في اليوم 7 ايام في الاسبوع ويمكن 365 يوم فيسبوك .. 500 شير لنفس الفيديو في الدقيقة .. 700 شير لنفس الاغنية العظيمة .. 300 شتيمة وتحية في الدقيقة لنظامنا الحيله .. 20 الف مجادلة وخناقة وتعسيفة في الدقيقة .. واشتغلات عظيمة .. احباط سعادة جنون خنقة ثورة تخاذل وكل الحالات المختلفة في نفس اليوم الواحد!! وياريته في الاخر بيرسي علي قارة .. لكن ياولداه كام نوت علي كام فيديو يبقي مؤيد وبشدة ويحلف ما في تراجع ولا استسلام .. وبعدها بسيكه يا ولداه كام نوت تانية علي فيديو تاني .. يقول يا جماعة وماله .. خليكوا حلوين بقي ومتعقدوهاش .. شوية وهيمشي وهتتعدل وهتبقي ذي الجلاش ..

مش معني كده ان الشير للفيديوز والنوتس والاغاني العظيمة مشكلة لا سمح الله .. بالعكس .. الشير ده والاتصال اللي من النوعية الغير مباشرة دي والمناقشات ويمكن كمان الجدال الي رايح جي ده هوا اللي جمع الناس من غير ما تحس وخرج اللي جواها وكان احد الاسباب الرئيسية في الثورة الجليلة .. بس المشكلة الحقيقة ان في حاجات كتيرة دلوقتي أهم واللهي أهم .. لو بصيت حوليك هتلاقي فنادق بقي اشغالها زيرو .. وبالتبعية كل الشركات والافراد المتعاملة معها اتكدرت واتأثرت وفلوسهم اتجمدت .. شركات مشت دلوقتي حالاً موظفين .. شركات تانية خفضت مرتبات موظفين .. شركات تانية بقت ولا استيراد ولا تصدير .. فلوس بتجري بره و حتي جوه تحت البلاطة من المقلقين .. سوق اتجمد ولا بيع ولا شرا علشان كله مستني يشوف بكره فيه ايه ..

أفتكر ان دلوقتي .. دلوقتي حالاً .. هو ده وقتك ودورك حتي لو في شغلك بس .. اخلاصك ليه .. تفكيرك فيه ، محاولة تخطيطك لبكرة ممكن يبقي فيه ايه .. اذاي تقدر تساعد شركتك ومجتمعك ولو حتي بفكرة .. فكرة واحدة من تركيزك في شغلك اللي محدش يفهمه اكتر منك .. ممكن تساعد .. مكن تنقذ موظفين .. ممكن متخفضش مرتبات .. ممكن تشيلك انت وغيرك .. أفتكر ان الفيسبوك بجلالة قدرة كان فكرة لواحد أصغر مني ومنك .. واللهي مجرد اخلاصك وتركيزك هيفرق كتير ..

أجمد شوية ؟ او لسه مشتغلتش او بتدرس .. ادخل علي مجتمعك .. استخدم الفيسبوك كأداه تنمية بجد ذي ما ناس استخدموها كأداه ثورة جليلة لينا .. اديها حملات حقيقية .. انزل الشوارع .. ساعد في بنك الطعام وغيره .. علي اد ما تدي علي اد ما بجد واللهي هتفيد ..

حتي لو مغترب .. افتكر ان البورصة اللي كان اللي داخل فيها مفقود واللي خارج برده مفقود هتبدأ الاسبوع اللي جاي ، وفي الاول والاخر هي احد اركان الاقتصاد المهمة .. واللي أكيد هتتأثر جامد جداً وخسايرنا هتبقي مليارات .. وده علي الرغم ان دلوقتي ممكن يكون احسن فرص الاستثمار فيها لأن كل الشركات المحترمه سعر اسمها هتكون في الارض وده دايماً احسن وقت للشرا .. افتكر انك ممكن تدخل وتشيل ولو ببعض الالفات القليلة جداً اللي مش محصلة اي حاجة من حياتك بره .. بس افتكر والنبي وحياة ابوك يا شيخ .. عايزين مستثمرين .. مش مضاربين .. مش عايزين مضاربين مهوسين .. يدخلوا يقماروا وياخدوا علي قفاهم ويتلبوا ويطلعوا منفوخين .. مش نخلص من هوس الفيسبوك نلاقي هوس شاشة التدول .. عايزين مستثمرين .. ناس تنقي شركات موثوق فيها وتسيب فلوسها بالسنة والاتنين .. ويعيش حياته عادي جداً بعيد عن وجع القلب المتين .. واللهي هتلاقي فلوسك القليلة ده رجعتلك اكتر بكتير بعد سنة أو اتنين .. بس كمان هتكون ساعدت وشاركت وشلت ..

العجيب بقي .. الخيال العلمي بقي .. واللهي انك برضة في 10 دقائق قبل النوم هتعمل نفس الشير لل 700 فيديو و500 نوت و300 أغنية عظيمة بس الجديد انك هتكون ساهمت وساعدت .

تحديث في مايو 2011: للأسف من الواضح جداً ان الثورة لم تصل للبورصة بعد ، نفس الاصابع الخفية ، نفس الالعاب الملتوية ومن الواضح انها مثل اشياء كثيرة بالبلد سوف تحتاج الكثير من الوقت نصحتي الشخصية .. اوعي تقرب اوعي تجرب .. خليك في شغلك وابذل فيه اقصي ما في وسعك .. هوا ده الامل الوحيد ..

أشرف عبد العظيم

خيال علمي: الاشتغلات السياسية والتعديلات الدستورية

يا فتاح يا عليم يا رزاق يا كريم ..

بص يا عم الحاج .. في الاول كده لازم تعرف ان اللي مكتوب تحت ده ليس له اي علاقة بفرض اي رأي علي اي حد من اي ناحية في اي حتة .. هو مجرد تعبير عن رأي ومجموعة من الافكار التي تعبر عني فقط ولا انصح اي أحد بأي حاجة في الدنيا .. غير انه يذاكر .. يفكر .. ويقرر .. علي مسئوليته الشخصية ..

لحد يوم السبت باليل .. كان عندي قناعة تامة .. ان سواء قولنا "نعم" او قولنا "لا" النتيجة واحدة علي ارض الواقع العملي لأن في الاول والأخر الهدف واحد .. يمكن يفرق في مخاطرة اكتر سنه .. او وقت اكتر سنتين .. بس محطتة الوصول واحدة .. وكان عندي قناعة تامه ان معظم المطالبين بلا او بنعم ومضينها صوت عالي هم يبحثون بشكل او بأخر عن مصالح سياسية .. شخصية .. فرض رأي .. وصاية .. اي هوبه والسلام .. بصراحة .. في وقت تاني كنت هنفض بمنتهي البساطة لكل العالم دي وهركز في شغلي وحياتي ، لكن للأسف داخلياً ضميري المنيل علي عينة قال لااااا ، بقي واجب رسمي عليك يا ريس ..  وكان السؤال العظيم (في الوقت ده) "هااااا يا معلم ؟ "نعم" وده يبقي خدمة جليلة للأخوان والوطني اللي بقدره قادر اتلموا مع بعض في جنب واحد ولا قصص الخيال العلمي ،، ولا لأ ويبقي يعيش البرادعي واخوانه واخواته ؟"

وطبعاً ذي الشاطر بقيت كل يوم اروح من الشغل ، اعمل النسكافية المتين واذاكر ، قراءة تعديلات ، كتابة علي الورق للنقط الغريبة العجيبة ، وضع سيناريوهات ، تلخيص لكل الفوائد المرجوة والعيوب المستفحلة ، قراءة مقالات عمو بلال فضل وكل الناس اللي بتقولك لأ يا حبيبي اوعي تعمل كده ، ومقالات ناس ذي الفل من حزب الوسط والاخوان يقولك يلا يا سيدي "نعم" ومتبقاش عيل رخم علي طول الخط بتقول لأ وادي فرصة .. وصباحو وجع الدماغ يا معلم ..  

الغريب .. واللهي الغريب .. واللهي العظيم الغريب .. انك هتلاقي كل نقطة في ليه نعم او لأ ، ذي ما في وجهة نظر وكلام منطقي ويمكن في بعض الاحيان أدلة وبراهين ، في برضة الناحية التانية وجهة نظر ، كلام منطقي ، وأدلة ةةةةة وبراهينننننن .. خيال علمي مش كدة ..

ولو نعم .. يبقي دستور 71 يرجع ذي الشاطر هوا كمان .. انتخابات تشريعية مجلسي الشعب والشوري .. وبعدين انتخاب رئيس جمهورية ودعوة لعمل دستور جديد ..

ولو لا .. يبقي المجهول يا معلم .. أو بمعني أخر نستنا نشوف هنسد الفراغ الدستوري اذاي ، وده طبعاً مش حلو علي الأمن ولا الاستقرار وكده الجيش هيفضل في الشارع شويتين بدل شوية ..

بس انا سمعت كلمة فراغ دستوري دي .. وفي ساعتها افتكرت واحدة من اكبر الاشتغلات اللي انا اتبعت فيها شخصياً يا معلم .. اشتغالة اخر اسبوع قبل تنحي الرئيس السابق .. لما كل الناس ذي عمو عماد أديب ( مع كامل احترامي ) وخالو السيد البدوي ( اللي معارضة ، والنعمة معارضة ) شرحوا اذاي ان الدستور ده متفصل بالملي .. بالشنتوفه علي الرئيس السابق وانه مواده ونصها لاتسمح بأي شكل من الاشكال بتنحيه وان اخرتها فراغ دستوري .. وانتخابات مشكوك في شرعيتها .. وطبعاً انا سمعت انتخابات مشكوك في شرعيتها .. افتكرت مرتضي منصور طوالي يا اخويا .. قلت يا داهية دقي .. يبقي كل ما ننتخب رئيس .. الراجل ده هيرفع عليه قضية ويشيله ذي ما عمل في الزمالك بالظبط لحد ما نلاقيش حل غير اننا نجيبه هوا شخصياً رئيس .. المهم .. بعيد عن اللي مايتسماش .. رحت جايب الدستور .. ومشيت مادة مادة من اللي بيكلموا فيها .. ونص نص .. لحد ما تأكدلي بقراءتي الشخصية ان بالفعل .. ده فراغ دستوري .. العجيب بقي .. الخيال العلمي بقي .. ان الرئيس السابق طلع وتنحي ولا بقي في فراغ دستوري ولا الهوا يا معلم .. واتاري الفراغ الدستوري ده اتسد تقريباً بكلمة "تخلي" بدل "تنحي"... وكله بقي ذي الفل ..

وطبعاً افتكرت مثل أمريكي (والله اعلم بس كان بالأنجليزي فبالشبه أمريكي يعني) كنت قاريته زمان أوي  .. "ان 90% من السياسيين فاسدين .. وال 10% الشرفاء .. هم فاسدين لتأثرهم بال 90%" ..

ولقيت فجأة اني بفصل نفسي تماماً عن كمية الاشتغالات السياسية لأني اقتنعت اد ايه سهل لوي وتزييف الحقائق في الشكل والصيغة المطلوبة اللي تخدم المصلحة وتنول المقاصد .. وفجأة برضة لقيتني بفكر بأبسط منطق ممكن ..

لو كل اللي فات ده حصل .. وثورة عظيمة .. ورئيس تخلي .. وفساد رهيب .. وبلطجية .. وشبح فتنة طائفية .. أيه ممكن تاني أكبر من كدة ممكن يحصل !! لو انا هعمل الصح .. في ابسط تفكير ممكن .. هيكون ايه غير حاجة جديدة نظيفة .. وأكيد هيكون في حاجة تانية شبه "تخلي" ، أكيد هيظبطونا يعني ..

بعدها .. نائب رئيس الوزراء صرح ان في حالة رفض التعديلات .. يبقي في أعلان دستوري من المجلس العسكري .. فكرت شوية .. ايه ده .. مش "تخلي" جديدة دي!! وهوا يا خويا الفرق بين التعديلات والاعلان الدستوري المؤقت ايه (بعيد عن الدستورية والقانونية و..  و..  و.. و..) هما الاتنين برضوا هيوصلوا لنفس المحطة .. بس علي الاقل الاعلان الدستوري مجاش بعبله ورجع دستور كل داهليز ودروب .. حتي لو الاعلان الدستوري مفروض من المجلس الاعلي للقوات المسلحة .. ماهي التعديلات مفروضة برضوا مادام انا مشاركتش في وضعها ولا هقدر اقول نعم او لا علي اي مادة بعينها .. لائما كله كله .. لا كله كله ..

طب استنه .. وسط كل اللي رايح جاي ده .. الاشتغالات السياسية دي .. انت عايز ايه بالفعل (سألت نفسي) ؟؟ انا عايز استقرار وامان .. استقرار علشان الشغل بتاعي والعجلة تمشي وامان علشان اقدر اعيش حياتي .. طب انت عايز مجلس الشعب دلوقتي في حاجة ؟ لا مش عايز ربنا يخده يا عم .. طب انت عايز الدستور دلوقتي في حاجة ؟ لا مش عايز ..  ده كان راجل بتاع مصالح ناس معينة يا عم وكانوا بيخدموا علي بعض ومفروض يحصلهم وممكن دلوقتي برضه يجي لناس معينة يا عم .. طب ايه اللي يفرق معاك بالفعل؟ اللي يفرق معايا بالفعل هوا الشغل .. واللهي الشغل .. واللهي العظيم الشغل .. هوا الحاجة الوحيدة اللي بعيد عن الصوت العالي والجدلات الفارغة والخمسميت رسالة في اليوم بتقولك قول نعم او لأ اللي سواء علي الفيسبوك والموبيل واللي ناقص تلقيها مكتوبة في الحمامات .. الشغل والاخلاص فيه .. هوا الحاجة الوحيدة اللي ممكن تنقذ موظف دلوقتي حالاً ممكن يكون بيمشي من شغله بسبب الظروف .. او شركة تانية علي وشك الافلاس .. او ناس باليومية مش لاقية .. وفي "أو" كتيرة أوي .. اللي يفرق بالفعل .. ان تركيز الحكومة والمجلس العسكري والاعلام العجيب المقيت وتركيزنا أحنا .. أحنا .. ان يكون اذاي يرجع بيئة العمل لأحسن من الاول ويقضي علي الفساد المستشري ويبقي ويبقي هدفنا اننا نتقدم .. نبقي احسن .. وده مش هيحصل غير بحاجة واحدة هي العمل .. اللي يفرق بالفعل .. اننا نستغل الطاقة الايجابية الرهيبة الموجود دلوقتي في هدف تنموي حقيقي الناس كلها تسعي ليه .. بدل ما كل الطاقة دي رايحة في "نعم" ولا "لا" .. أخضر ولا أحمر .. وبدل ما في الاخر بعد كل كمية الاشتغالات السياسية دي .. تلاقي مفضلش بعدها غير طاقة سلبية فقط .. منستغل قوة الدفع الرهيبة الموجودة دلوقتي! .. اللي يبفرق بالفعل .. هوا الشغل .. علشان ناس بدل ما دلوقتي مش لاقيه تتعين .. تتعين .. وبدل ما الموظفين يمشوا .. يفضلوا .. الشركات تتوسع وتعين اكتر واكتر .. وساعتها بدل ما واحد (وطبعاً ده مش واحد بس) ماهو مكدر دلوقتي حتي لو رايح يقول نعم أو لأ بسبب ظروفه ومسئوليته ودنيته المنيلة بنيله اهو يروح كمان شوية وهوا مرتاح .. قادر يفكر مرتاح .. عنده طاقة تحمل يقدر يستغلها لوعي اكتر ومستقبل افضل ..

ليه دلوقتي ميكنش وقت العمل والشعب والشوري والدستور العزيز مش رايحين في حته .. جايين واللهي ؟؟

ليه دلوقتي ميكنش وقت التدريب والتثقيف والاستفادة من الخبرات الداخلية والخارجية في مجالات العمل المختلفة والنقابات والديموقراطية والصناعة اللي واقفة و .. و .. و .. ؟؟

ليه دلوقتي ميكنش في هدف عظيم ان الناس كلها تحس بالتغيير بدل ما كلنا ميتين في جلدنا علشن لو قولنا نعم .. في قلق .. ولا قلنا لأ .. برضة في قلق ..

ليه الجيش وقته وجهده هيتوجه ناحية استفتاء وبعدين انتخابات مجلس شعب وانتخابات رئاسية وكله في كام شهر .. ما يوجه الجهد والوقت اللي محتاجه في تنظيم وتأمين الاستفتاء وحماية المواطنين من البلطجة في انتخابات مجلس الشعب وتنظيمه وتأمينه لتوفير أمن واستقرار الاقتصادي .. لتوعية الناس اللي متعودة علي الخمسين جنيه في الانتخابات في أيديه .. لملاحقة الفساد المستشري واللي هينجح في المجلس! وهنقول عليه مشبوه ..

ارجو النشر لو شعرت ان هناك افادة

ملحوظة: كنت اتمني طول عمري عدم ذكر اسم شخص معين في أي شئ لأني مؤمن ان مجرد ذكر اسمه هوا رفع لقيمته التي لا تساوي شيئاً ، بس للأسف اضطرت لذلك لذكر ما كنت اشعر بيه تماماً .

حزب الصوت اللي يغيظ

حزب عجيب وغريب .. هدام متشائم كئيب  .. كله سواد ووجع قلب وتعب عين و ارهاق عقل ووجع مناخير لأنه ريحته مفيش اوحش منها .. 

حزب .. غريب في اعضاءه المختلفين المتنوعين .. يعني ممكن تلاقيهم ليبرالين علي سلافين علي اخوان علي علمانيين واقباط وحتي ناس عاديين .. 

حزب .. الحاجة الوحيد المشتركة بينهم هي الصوت العالي اللي يغيظ .. حب النفس وفرض الرأي والوصاية علي الاخرين .. يدعو للحرية والديمقراطية بابوقها المختلفة من اسلامية الي ليبرالية الي علمانية ولايستمع ولايتفهم الاخرين .. 

حزب .. بكتيره 15% من كل الموجودين... وتلاقيه مالي الصورة وحاطط البرواز ومتبت في ودن المستمعين .. وعامل فيها انه الممثل الرسمي ليا وليك وجميع الحاضرين والغائبين .. 

تلاقيه في السلفيين .. راسم الصورة كفر وضلال وبعد عن الشرع والدين .. وهوا مفبرك كل الفيديوز والخطب وبيشتغل رايح جي في البنادمين .. ومصبته انه بيلعب بأسم الدين .. وهوا بعيد كل البعد عن السلفيين المحترمين الصالحين اللي نهجهم قراءن الله وسنة رسوله الكريم .. وبيتبعوا كل السلف الصالح من رسل واولياء راشدين .. وبيستمعوا وينصتوا ويتفكروا في رأي الاخر قبل اراءهم مثل كل الافاضل الاكرمين .. 

وتلاقيه في الليبرالين .. ملوش حدود من قلة ادب وصفاقة وحتي سب دين .. كل شئ مباح تحت شعار حرية الفرد التي تقف أو لاتقف عند حدود الاخرين .. وهوا من استاذة المتناقضين ، وبعيد كل البعد عن الليبرالين الداعين للمساواة وعدم الاستبداد وقهر الاقاليات بأسم الجنس او العرق او الدين.. 

وتلاقية حتي في الناس العاديين .. اللي بيقفل عقله وقلبه ويسلم نفسه ان يكون بوق لتيار او اتجاه من غير تعقلولا تفكر ولاحرص علي نفسه او الاخرين .. 

هنا بقي يجي دوري ودروك ودور حزب الكنبة العظيم .. اللي بالفعل مؤمن انه عظيم .. لأنه القاعدة العريضة المعتدلة البعيدة عن المصالح والاشتغالات السياسية .. مصلحتها الوحيدة الامن والكرامة والاستقرار والتطوير والعمل للبلد ده... وهي بالفعل قاعدة الاستقرار لبلد نسيجه كله الوان مختلفة متباينة من مسلم ، قبطي ، سلفي ، أخواني ، صوفي ، شيعي ، كاثوليكي ، ارثوذكسي.. الخ ، اللي اسهل لعبة لهدم نسيج البلد ده هي الفتنة وفرق تسد .. تقدر تتخيل بلد جبهة المؤيدين فيها لأي موضوع 40 مليون وجبهة المعارضين فيها 40 مليون والاتنين عانوا تعليم ضحل وتربية بعيدة كل البعد عن تقبل الاخر والاستفادة من الخلافات والاختلافات ؟ تتقدر تتخيل نتيجة التصادم ايه ؟

وهي ايضاً قاعدة الاغلبية اللي تقدر تشد المتطرفين فكراً وقولاً وفعلاً الي الاعتدال والهدوء والتعقل سواء مسلم أو قبطي ، ليبرالي أو سلفي ، متحرر أو محافظ اللي لايزيدوا في الاول والاخر عن 15% من النسيج .. 

دورنا .. الكلمة الطيبة اللي بنية سليمة اللي كلها حب واحترام وعدم اتهام وابتسامة مشرقة هي دورنا ودور حزب الكنبة العظيم .. الكلمة دي بجد ممكن تفرق مع اي واحد من حزب الصوت العالي .. تقدر تخليه يتفكر .. ويتعقل .. ويقيم .. ويأخذ هوا قراره السليم ..